انا تربية ابويا الفلاح مش عمر عفيفي يا استاذ

لا حكم العسكر باجسام شباب مصري جميل بيحب مصر

يوم 25 يناير في يونيون سكوير نظمنا وقفة صغيرة للتضامن مع اخواتنا في ميادين الحرية في مصر، واللي اقترحت الفكرة دي واحد ممن اعتز بمعرفتهم منذ ان جئت إلى ارض الكوابيس دي أو زي ما الناس في العالم بتسميها ارض الاحلام والله ما يعرفوش حاجة – صديقتي العزيزة ميشا وهى مصرية بالقلب والعقل والروح وخفة الدم وصديقتي المصرية ندى المنسى، الاتنين اقترحوا اننا نكتب جملة “لا لحكم المجلس العسكري” بأجسامنا على الارض، لنؤكد رفضنا ان يظل حكم مصر عسكري، فما قامت ثورة يناير الا ليستعيد الانسان المصري كرامته وانسانيته المهدرة والتخلص من الطاعة العمياء التي حاول حكامنا على مدار التاريخ فرضها علينا.

ولأننا كنا عملنا مظاهرة اكبر يوم 21 في التايمز سكوير للتضامن مع الثورة، جه يوم 25 وعشرين وشوفنا الملايين زحفت اللي ميادين الحرية في كل ارجاء مصر، فغيرنا بصراحة وحزنا اننا مش معاهم، اتكلمنا مع بعض يوم 24 بالليل واتفقنا نتجمع بكرة يوم 25 نهتف مع اخواتنا في مصر ونسمعهم صوتنا من هنا، كنا عارفين ان مافيش ناس كتير هتيجي عشان الوقت كان متأخر وناس كتير ما عرفتش، بس روحنا ولقينا عدد لا باس به من شباب مصر الجميل سواء اللي عايش واتولد هنا أو بيتعلم هنا زي حالاتي، وكتبنا “لا لحكم المجلس العسكري” واخدين بالكم المجلس العسكري مش الجيش.

صحيفة الوفد غطت الخبر ونزلت الصور على موقعها ونزلت التعليقات بقى على الخبر، وكانت في مجملها تتهمنا بالعمالة والخيانة، واننا تربية الجاهل اللي اسمه عمر عفيفي، واننا قابضين ولستة التهم الجميلة دي، فكرتني التعليقات دي بيوم من ايام الثورة السنة اللي فاتت كنت خارج من الميدان وانا في الاسعاف وطبعا شايل علم مصر واحد كبير كان قاعد قدام المحل بتاعه وقفني وقالي ها خدت الخمسين جنيه، بصيتله كده وضحكت وقولتوا يا يا حاج فلوس ايه بس روح بس كده وشوف لو في خمسن جنية خدها وتبقى المستفيد ولو مافيش يبقى تشوف بعينك ايه اللي بيحصل جوه الميدان، المهم بعيدا عن الحكايات دي التعليقات مش استفزتني لاني متعود عليها وسمعناها كتير ولسه بنسمعها لحد دلوقتي. كنت قاعد بذاكر في المكتبة وانا بقرا الخبر سيبت الكتب وفتحت صفحة وورد وقعدت كتب التعليق ده من غير أي ترتيب وباللغة العامية، بس عشان اقول للناس اللي بتتهمنا بالتهم الباطلة دي من فضلكم راجعوا تفكيركم، انا ما قولتش حاجة جديدة بس منا باب امر المولى عز وجل، قال تعالى: “وذكر فإن الذكرى تنفع المؤمنين.”

والله انا مش مصدوم من التعليقات دي حرية راي، بس بطلب من الناس اللي اطلقت على الناس دول رعاع وعملاء وخونة وقابضين والكلام اللي احنا لسه بنسمعه من ايام مبارك يقولو ليا عرفتوا منين المعلومات الخطيرة دي وما هي مصادركم. عايز اقولكم شوية حاجات، وانتم احرار برضوه تاخدوا بيها أو لا:

اولا: انا كنت واحد من الناس اللي شاركت في الوقفة دي، اسمي محمد عبد الرحمن عبد الحميد محمود الجوهري، الاسم كامل اهو لو عايزين الرقم القومي بتاعي وعنواني في مصر قولوا ليا وانا اقولكم عليه، بدرس ماجستير في العلوم السياسية في جامعة نيويورك، حصلت على البكالوريوس من جامعة القاهرة وكنت موجود في ميدان التحرير السنة اللي فاتت زي زي مصريين كتير نزلوا يوم 25 اللي فات، والناس اللي انتم شايفنهم دول كلهم ناس محترمة وبيدرسوا في جامعات محترمة هنا في ارض الكوابيس، وكلهم كمان مصريين، وكان في ناس مش مصريين تضامنوا معانا وشاركوا كمان في التنظيم

ثانيا انا لا اعرف عمر عفيفي شخصيا ولا انا تربيته ولا يشرفني ان اكون حتى في صورة معاه، انا تربية ابويا الفلاح البسيط عبد الرحمن او جمال زي مابينادوله في البلد، هو اللي رباني وطفح الكوته عشان يعلمني تعليم صح وعلمني احب بلدي علمني ما اسكتش عن الحق حتى ولو على رقبتي، رباني وعلمني الصلاة والصوم واداء فرائض الله

ثالثا: انا لا ليا علاقة بستة ابريل مع احترامي ليها ولا باي حركة او ائتلاف سياسي وغالبية الناس اللي في الصورة مالهومش علاقة باي من المسميات دي، دول ناس بتحب بلدها وعايز تشوفها احسن حاجة.

رابعا: ما فيش حد نظمنلنا المظاهرة دي احنا عملنا مظاهرة كبيرة يوم 21 في ميدان تايمز سكوير وبعدين واحنا بنتابع اللي بيحصل في الميدان يوم 25 عشان فرق التوقيت طبعا التحرير كان سابقنا بكتير فبعتنا لبعضنا وقولنا ننزل نعلن تضامنا مع الاحرار في مصر.

خامسا: في ناس بتقول ان اللي ضربو وموتوا الناس في الشارع دول اللي حاربوا في اكتوبر، بحسابات المنطق كده حرب اكتوبر كانت سنة 1973 يعني كل اللي شارك فيها يا اما استشهد فيها او توفاه الله بعد ذلك أو ربنا يديلوا الصحة على المعاش دلوقتي، مش فاضل غير شوية الجنرالات اللي بيحكموا البلد دلوقتي.

سادسا: الناس اللي كانت موجودة كلهم مدركين الفرق بين المجلس العسكري والجيش الذي هو مؤسسة وطنية وانما المجلس العسكر ربنا الاعلم بيهم. عشان كده قولنا وبنقول “لا لحكم المجلس العسكري.”

لكل واحد الحرية يقول اللي هو عايزه وينتقدنا زي ما هو عايز، بس تقول عليا وعلى الناس دي اننا رعاع وعملاء ما ينفعش او سميه زي ما انت عايز تسمية، لاني ما اقدرش اقول دا اسمه ايه عشان انا تربية ابويا الفلاح المصري مش تربية عمر عفيفي.

One response to “انا تربية ابويا الفلاح مش عمر عفيفي يا استاذ

  1. تسلم ايدك يا جوهرى… دع الكلاب تعوى و القافله تسير…. لازم تعرف ان كل حاجه بنعملها هنا بيكون لها فرق كبير و تأثير قوى و بتبقى معلمه عليهم و لذلك هم يطلقون كلابهم المسعورة المأجورة لتطلق علينا الإشاعات و الإفتراءات فاكرين انهم كده حيأثروا علينا و مش عارفين ان ده بيزيدنا قوة و عزيمه و إصرار.
    ربنا يكرمكم انت و كل مجموعه الشباب اللى معاكم و انا فخور جداً بمعرفتكم… جزاكم الله كل خير
    ثورتنا مسترة حتى تحقق جميع أهدافها…
    تقبل تحياتى و إحترامى
    محمد البارودى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s