هلوم نفسي واضربها بالجزمة

التدوينة دي عايز تقراها اقراها مش عايز تقراها برضوه براحتك وممكن تقراها من فوق لتحت أو من تحت لفوق، من الشمال لليمين أو من اليمن للشمال ما يهمش ، ولو قراتها وما عجبتكش ممكن تقفل الصحفة أو تعلق وتشتمني وتقولي انت ما بتفهمش حاجة، ببساطة لان هيكون عند حق وانا برضوه هلوم نفسي واضربها بالجزمة.

ها تقولي يا عمي انت هتقرفنا ليه ما تحط لسانك جوه بقك واقعد ساكت، هاقولك لا مش هاسكت تاني، اللي مش هيعجبني هاقول انت ما بتفهمش عشان كذا وكذا، مش ها أدي ودني لحد تاني البرادعي بقى أو حمدين أو الفتوح أو أي حد من النخب المتعفنة دي واللي مش هايعجبني من اشباه الثوار واللي خدوا الثورة سلعة يتاجروا بيها واللي تكلمهم يقولك ان باشتغل ثورجي، والنبي ايه وحياه النبي طيب احلف، هيا الثورة بقت شغلانة اليومين دول، هاقولوا انت مش فاهم يعني ايه ثورة قاعدلي على تويتر وفيسبوك والفضائيات تسخن في الشباب البرئ يروح يتقتل وانت قاعد تتفرح ما شفتش خدش واحد في جسمك وفي الأخر تقولي ثورجي، ويوم ما تروح تروح بعد ما الضرب يهدي عشان تقعد تتويت وتهزي علينا عن بطولاتك ومتابعتك ووجودك في الخطوط الامامية يا اخي احيه على رأي الاسكندرانية الجدعان ولا ايوه عليك على راي السواسية اللي عرفوا يعني ايه ثورة بجد واول واحد مات فيها كان من عندهم، ولا هاقولك يا شيخ اتقي الله انت ما شفتش الاخ اللي وقف قدام المدرعة في شارع القصر العيني يوم 25 يناير ولا السلفي الشجاع اللي أمّ الناس للصلاة العصر على كوبري قصر النيل يوم 28 يناير ولا شوية السرسجية اللي مش بيعجبوك وتقول عليهم دول مش الثوار اللي طلعوا يوم 25، هاقول مانت ما تعرفش يعني ايه فقر ويعني ايه تكون محتاج ومش لاقي تلبس كويس، قاعد تنظرلي وتقول للناس اعملوا واعملوا، ما انت حساباتك مختلفة عننا انت الحمد لله ربنا كارمك ومعاك فلوس ولو قعدت في بيتك وما اشتغلتش هتلاقي حد ياكللك ويدفعلك فاتورة الموبايل والانترنت عشان تفضل تهزي وتخري علينا، لكن هو وانا وابويا وعمي لو قعدنا في البيت يوم واحد مش هنلاقي ناكل.

طيب هاتقولي انت عايز يا عم انت هاقولك ولا حاجة انا بس بلوم نفسي وبضربها بالجزمة بعد اللي حصل النهاردة عايز تعرف ليه ممكن تقرا اللي جاي مش عايز براحتك اقفلها واعملي بلوك وممكن كمان تشتمني وتلعني وتسبني

ما احنا كلنا عارفين انها لعبة وعارفين ان النظام القديم بيدافع عن مصالحه وفساده بس انت ما فهمتش اننا كمان لازم ندافع عن ثورتنا وعن حريتنا

عندي شك كبير ان الميدان هيرجع لينا وها نرجعله زي زمان يارب أطلع غلطان

لو ركزتوا شوية في منطوق الحكم تعرفوا ان الشخص اللي لازم نخلعه النائب العام، القاضي يحكم بما امامه من ادلة مادية

النائب العام وشفيق من قبله هما كلمة السر في مهرجان البراءة بتاع النهاردة النائب لم يقدم ادلة ملموسة وشفيق اتلف الادلة اصلا لما جابه مبارك رئيس وزرا

احنا مش عايزين نتعلم الفيس بوك مليان بدعوات للعودة للميدان، عايز الميدان بجد روح كلم الناس وخدهم معاك الناس في وادي والفيسبوك في وادي تاني

ليه ما فيش حد بيلوم على فريق الادعاء وشوية المحامين زي سلطان وابو سامعين اللي ما فيش حد فيهم كلف نفسه وعمل فريق ادعاء بجد عشان حق الناس دي

انا مش هلوم النظام القديم دول ناس بتدافع عن مصالحها وفسادها ان هلوم نفسي عشان ما عرفتش ادافع عن ثورتي

انا هلوم اشباه الثورة اللي حولوا الثورة لسلعة بسببها تاجروا وعملوا احلى بزنس سفريات وقنوات فضائية وفلوس

انا هلوم نفسي عشان احنا افتكرنا ان الثورة ميدان التحرير بس ومظاهرات واعتصامات ومفهمناش ان الثورة دي حالة يجب ان نعيشها ونساعد الناس يعشوها

انا هلوم نفسي عشان ما عاملتش المطلوب مني في اني انزل الشارع واقول للناس يعني ايه ثورة يعني ايه تغيير يعني ايه حياتنا ممكن تكون احسن

انا هلوم نفسي عشان سيبت الناس للمجلس العسكري يلعب بعقلوهم ومش بس كده دا انا كمان ساعدته ان يشيطن الثورة بغبائي وحمقي

انا هلوم نفسي عشان سيبت الثورة تتفرق شيعا بين شوية اشباه ناشطين واشباه ثوار فاكرين نفسهم ما جبتهموش ولادة وخرجوا يعثون بالثورة فسادا

انا هلوم نفسي عشان خليت المجلس العسكري يجرني لمعارك جانبية واحنا زي البلهاء طلعنا نجري وراه مرة ورا مرة

انا هلوم نفسي عشان صدقت شوية المتنطعين اللي مسمين نفسهم نخبة يلعبوا بيا الكرة عشان مصالحهم الشخصية واحنا زي الهبل جرينا وراهم يمينا ويسارا وسلفا واخوانا والاسمين وليبراليين

انا هلوم نفسي عشان ما ادركتش من الاول ان شوية النخب النكب اللي ابتلانا بيها ربنا كانت جزء من نظام مبارك يشتموه الصبح ويناموا في حضنه وحضن امن الدولة بالليل

انا هلوم نفسي عشان كنت مصدق واحد زي ابراهيم عيسى عشان صدقت واحد زي ابو حامد عشان سيبت واحد زي البدوي ورفعت السعيد يبخ سمه بين الناس

انا هلوم نفسي عشان في يوم قعدت سمعت واحد زي نبيل ذكي وضيعت وقتي في قراءة مقال له عشان في يوم قرات مقال لابراهيم عيسى

هلوم نفسي عشان ضيعت وقتي في قراءة كلام فارغ المضمون كتبه حمزاوي في عموده ونسيت الشارع

انا هلوم نفسي عشان افتكرت ان الثورة دي عشاني انا بس عشان افتكرت اني عايش دلوقتي لوحدي والثورة عشان مستقبلي بس

هلوم نفسي عشان نسيت ان فيه ناس كتيرة عايشة معايا دلوقتي ما اقدروش يغيروه بس ده مش ذنبهم هما علموني عن قصد او دون قصد عشان اغير

انا هلوم نفسي عشان قعدت اقول ابويا وامي هما اللي ودون في داهية وفضّلوا يعيشوا في ذل ونسيت انهم استحملوا الذل عشان يرضعوني شوق وشغف للحرية

انا هلوم نفسي عشان بدل ما ارد الجميل لابويا وامي عشان زرعوا بقصد او بدون قصد نبتة هذه الثورة طلعت على الفضائيات اشتم فيهم واقولهم انتم جهلة

انا هلوم نفسي سيبت شوية منتفعين من الاحزاب والقوى السياسية يلعبوا الكورة بالثورة والشعب لا ومش بس كده دا انا لعبت معاهم كمان

انا هلوم نفسي عشان قعدت اقول دول بويزعوا زيت وسكر وشاي، بس ما نزلتش اوزع وعي وامل على الناس

انا هلوم نفسي عشان شتمت الجعان الفقير اللي خد كيس السكر والزيت وقولته يا حمار انت حمار وجاهل عشان عايز تأكل ولادك وتأكل نفسك ومراتك

انا هلوم نفسي عشان ما اعرفتش اتكلم مع الناس بلغة يفهموها روحت اقولهم روسو وتوكفيل وادم سميث بيقولوا كذا وكذا والتاني بيقولهم قال الله والمسيح والرسول

انا هلوم نفسي عشان صدقت واحد زي ابو الفتوح وصباحي عشان ما فهمتش ان كل واحد فيهم كان عايز الكرسي عايز يبقى فخامة الرئيس وبعد كده نتكلم في مصر بقى والنهضة ومصر القوية

انا هلوم نفسي عشان صدقت في يوم الايام البرادعي، كلام حلو وعالي اوي بس فعل ما فيش ويوم ما انطلب منه يواجه هرب وقالك لعبة، جيبت انت التايهة يا برنس

ما احنا كلنا عارفين انها لعبة وعارفين ان النظام القديم بيدافع عن مصالحه وفساده بس انت ما فهمتش اننا كمان لازم ندافع عن ثورتنا وعن حريتنا ولازم نلعب اللعبة صح عشان نكسب مش ننسحب والحكم يصفر بانتهاء اللعبة ويعلن خسارة المنسحب وفوز الذي صمد وقاتل واستوحش من اجل الدفاع عن مصالحه

انا هلوم نفسي عشان في يوم صدقت واحد زي عصام سلطان المحامي القدير اللي بدل ما يقعد يتخانق مع البرادعي ما عملش فريق ادعاء محترم لاسر الشهداء

انا هلوم نفسي عشان في يوم قولت على اسماعين انه راجل هادي ومحترم وهو كداب كبير ضحك علينا مرة عشان امه ومرة عشان ما دافعش عن الحق ودور على الكرسي

انا هلوم نفسي واضرب نفسي بالجزمة وهاقول لنفسي الثورة دي حالة لازم اعيشها واعيش اهلي وولادي فيها واقولهم الثورة دي دفاع عن الحق وليست فقط مظاهرات

هلوم نفسي عشان ما قولتش للناس ان الثورة مش مظاهرات بس، زمان لما كنا بنقول مظاهرة كان العسكر يقفوا على رجليهم دلوقتي ولا بيتهز ليهم شعرة

هلوم نفسي عشان احنا عرفنا العسكر اخرنا شوية مظاهرات وشوية مبادرات ما لهاش لازمة عشان هيا اصلا مبادرات ضد بعضنا البعض وليست ضد العسكر.

على فكرة الجزمة دي ليا انا مش لحد تاني والكلام ده ليا انا واللي على راسه بطحة يحسس عليها وانا الحمد لله بحسس على بطحتي ومش مكسوف لان الاعتراف بالحق فضيلة.

One response to “هلوم نفسي واضربها بالجزمة

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s