كنت ها اقاطع بس لا

امبارح بعد ما صدرت الاحكام وشوفت الميدان يستعيد بريقه مره أخرى ولو بصورة جزئية قولت خلاص انها موجة ثورية من جديد، ويلا ربنا معانا، وسمعت الناس بدأت تتكلم تاني عن مجلس رئاسي يا مسهل،

اوعى تنسوا انها ثورة

الميادين اتملت والهتاف بيهز مصر كلها. يا الله الله اكبر وحياة دمك يا شهيد ثورة تاني من جديد.

ولكن اليأس بدأ يتخلل إلى قلبي من تاني، عشان حاجات كتيييييير، اولها ان مع اخر الليل العدد في الميدان بدأ يقل، فبدأت استعيد اللحظات التي تلت اجبار المخلوع على التنحى، عندما تحولت المظاهرات المليونية إلى مجرد طقس احتفالي وليست اداة ضغط كما كانت طوال الـ 18 يوم، يعني اهو كل واحد ياخد المدام والاولاد ويطلعوا على الميدان اهو منها وفسحة ومنها انهم شاركوا في الثورة، ودا مش وحش بس المظاهرات دي اداة ضغط لتحقيق أهداف محددة.

حاجة تانية مرشحين الرئاسة انطلقوا إلى الميدان ليشاركوا الثوار احتجاجهم، ودا برضوه مش وحش، بس الميدان مش محتاج ناس تهتف الميدان محتاج ناس وقادة توجه هذه الطاقةس الهائلة في اتجاه يخرج مصر من ازمتها وينقذ ثورتها من السقوط في الهاوية، بس اللى حصل ان عبد المنعم ابو الفتوح وحمدين صباحي وخالد على ومحمد مرسي نزلوا يهتفوا ويعتصموا، وزي ما وائل غنيم قالهم امبارح الميدان مش عايز ناس تهتف الميدان عايز ناس تقدم حلول عملية، لكن اقول ايه نخبتنا سبب نكبتنا، حتى النخبة اللي كنا بنعول عليها والانتخابات اظهرت ان لهم قاعدة شعبية لا يستهان بها ولكن يبدو انه ما يزال ينقصها الرشد والنضج السياسي.

حاجة تالتة لما بدأ الثوار يطرحوا حلول عملية زي تشكيل مجلس رئاسي مدني، طبعا بعيدا عن الجدل حول امكانية تشكيل هذا المجلس الآن وما اقصده هنا من الناحية الصعوبات العملية وليست الصعوبات الدستورية اللي مالهاش لازمة اللي اتكلم عليها النائب المخترم عن جماعة الاخوان المسلمين عصام العريان اللي لسه مش فاهم لحد دلوقتي ان دي ثورة، البرادعي وافق الحمد لله بس للأسف هو في فينا دلوقتي وقال انه هيرجع يوم الاتنين عشان يتشاور مع القوى الوطنية، ماشي يا سيدي، انا مش متفاجأ ما انت عملت كده يوم 25 يناير 2011 وقولت دي ثورت شباب وخايف لا يقولوا اني جاي عشان اخطفها، وانا بقولك يا عم خليك عندك، الثورات عايز واحد مقاتل مناضل مستعد يقف قدام الدنيا كلها، وانت كان عندك الفرصة ناس كتيرة بتحبك وانا واحد منهم، كانوا محتاجين بس يشوفك وسطهم مش قداهم بس انت مش عاوز.

الحاجة الرابعة بقى الفشيق احمد بلوفر، هذا الشيطان، قمت النهاردة الصبح من النوم الاقيه عامل مؤتمر صحفي من مؤتمراته اللوذعية، بس المرة دي الصراحة الفشيق كان مرتب اوي وكلامه واضح ومحدد، عمر سليمان اظاهر خده اداله كورس تمام في مبنى المخابرات وذوده بشوية معلومات وادعاءات تمام التمام، تحدث بقى عن الاخوان وحسيت ان احمد شفيق ده هو اللي كان واقف قدام المدرعة يوم 25 يناير في شارع القصر العيني. قبل كده كنت بشوف احمد شفيق في مؤتمراته ولقاءاته العكشوية رجل شرير بيتكلم يعني واحد بيهرتل زي توفيق عكاشة، بس المرة دي حسيت ان فيه شيطان واقف قدامي وان الراجل ده هينفخنا واحد واحد.

قولت لنفسى لا والله ما انا مقاطع، لازم اطلع دلوقتي على السفارة وهاصوت لمحمد مرسي اه لمحمد مرسي، يا عم دول اخوان وشوف عملوا فينا ايه وفي الثورة عارف والله بس اخف الضررين، اه احنا هنشوف ايام سودا سواء مع ده أو مع ده، بس مع  شفيق هبيقى السواد والمرار طافح بزيادة، شفيق معاه العسكر والشرطة وكل الاجهزة الامنية بكل جبروتها، لكن الاخوان يادوب هايعملوا ايه ولا حاجة شوية تصريحات خايبة على كام قانون ممكن يطلعوه، وديتهم كان مظاهرة بجد والليلة تخلص، أو لو ما مشيوش كويس بالانتخابات هنرميهم بره، على الاقل مش هايقعدونا على الخوازيق، الاخوان فيهم العبر بس فيهم ناس جوه محترمة، شباب زي الفل ممكن يقف معانا وقت الأزمة، بس فشيق واللي معاه ما فيش حد فيهم محترم ممكن يقف معانا، دول لو طالوا يحطونا كلنا في افران غاز هيعملوها والله ومش هايهمهم. وقولت لنفسي لو كل صوت هايقاطع بيزود فرص الشيطان الجديد الفشيق البلوفر، فا رحت وعلمت على محمد مرسي، بس مش زي ما عملت في الجولة الاولى، في الجولة الاولى عملت علامة صح قدام حمدين المرة دي علمت قدام مرسي بعلامة X وبعتله رسالة مع ورقة الاقتراع قولت فيها:

دي ثورة

أه انا اخترتك يا مرسي بس اوعى تنسى ان دي ثورة اوعى في يوم تفتكر ان الرئاسة دي شعبة من شعب الاخوان الثورة قامت من أجل العيش والحرية والكرامة الانسانية ولو في يوم نسيت عندك اليوتيوب ادخل عليه واكتب ميادين التحرير مصر 2011- ….

دي ثورة

محمد الجوهرى

3\6\2012

اللهم انصر هذه الثورة واحمها من غباء وحمق الاصدقاء وغدر وانتقام الاعداء

هذا والله تعالى اعلى واعلم

One response to “كنت ها اقاطع بس لا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s